ផ្សែង​​ផេះ​ដ៏​ខ្មួលខ្មាញ់​លាយឡំ​នឹង​​ សំឡេង​បន្ទុះ​ភ្នំភ្លើង​កាល​ពី​​ម្សិលមិញ​នៅ​ក្នុង​កោះ សូម៉ាត្រា បាន​បណ្ដាល​ឲ្យ​មនុស្ស​១៤​ស្លាប់ និង​​ជា​ច្រើន​​នាក់​ទៀត​បាន​បាត់​ខ្លួន​។
ប្រជាពលរដ្ឋ​រត់​គេច​ពី​ផ្សែង​ផេះ​ភ្នំភ្លើង​​ Sinabung កាល​ពី​ខែ​កញ្ញា​ឆ្នាំ​២០១៣
តាម​ការ​អះអាង​របស់​អាជ្ញាធរ​ ភ្នំភ្លើង Sinabung បាន​ព្រុស​កម្អែល​ភ្លើង និង​ផ្សែង​ផេះ​ក្នុង​កម្ពស់​ប្រមាណ​ជា​២​គីឡូម៉ែត្រ​ចាក់ចូល​លំនៅឋាន​របស់​ ប្រជាពលរដ្ឋ បណ្ដាល​ឲ្យ​មនុស្ស​១៤​នាក់​ស្លាប់។ អាជ្ញាធរ​បាន​បញ្ជាក់​ថា ចំនួន​នាក់​ស្លាប់​​អាច​មាន​ការ​កើន​ឡើង ស្រប​ពេល​ដែល​ប្រជាពលរដ្ឋ​ជា​ច្រើន​នាក់​ទៀត​បាន​បាត់​ខ្លួន​នៅ​ឡើយ។
​ភ្លាមៗ​បន្ទាប់​ពី​ការ​ផ្ទុះ ​ក្រុម​អ្នក​ជួយ​សង្គ្រោះ​មិន​អាច​ចូល​ទៅ​កាន់​កន្លែង​កើត​ហេតុ​​ជួយ​ សង្គ្រោះ​ជន​រងគ្រោះ​បាន​​នោះ​ឡើយ ដោយសារ​តែ​​​ផ្សែង​ផេះ​​មាន​លក្ខណៈ​ធ្ងន់ធ្ងរ​ពេក។
កាល​ពី​ឆ្នាំ​២០១០ ភ្នំភ្លើង​ខាងលើ​ បាន​ផ្ទុះ​ម្ដង​រួច​មក​ហើយ​ដែល​​បាន​បណ្ដាល​ឲ្យ​មាន​អ្នក​ស្លាប់​២​នាក់ និង​​៣០.០០០​នាក់​ត្រូវ​បាន​បង្ខំ​ចាកចេញ​ពី​លំនៅឋាន​របស់​ពួកគេ បន្ទាប់​ពី​វា​បាន​ស្ងប់ស្ងាត់​អស់​រយៈ​ពេល​៤០០​ឆ្នាំ ហើយ​វា​ក៏​បាន​កម្រើក​ម្ដង​ទៀត​កាល​ពី​ខែ​កញ្ញា​ឆ្នាំ​២០១៣​កន្លងទៅ​នេះ  បង្ខំ​ឲ្យ​អាជ្ញាធរ​ជម្លៀស​ប្រជាពលរដ្ឋ​​​រាប់ពាន់​នាក់​បន្ថែម​ទៀត​។
ទោះបី​ជា​យ៉ាងណា​ក៏ដោយ ​មាន​ប្រជាពលរដ្ឋ​មួយ​ចំនួន​ត្រូវ​បាន​អនុញ្ញាត​ឲ្យ​វិលត្រឡប់​ទៅ​កាន់​ លំនៅឋាន​របស់​ពួកគេ​ហើយ​មកទល់​នឹង​ពេល​នេះ បន្ទាប់​ពី​អាជ្ញាធរ​ប្រកាស​ពី​ភាព​ស្ងប់ស្ងាត់​ទៅវិញ​នៃ​ភ្នំភ្លើង​នេះ ខណៈ​ដែល​ប្រជាពលរដ្ឋ​មួយ​ចំនួន​ទៀត​នៅ​មាន​ការ​ភ័យខ្លាច និង​កំពុង​ស្នាក់នៅ​​ជំរំ​សុវត្ថិភាព​នៅឡើយ៕​
សូម​មើល​រូបភាព​ពី​ការ​ផ្ទុះ​ភ្នំភ្លើង​នេះ​កាល​ពី​ម្សិលមិញ​ដូច​ខាងក្រោម​នេះ!
ភ្នំភ្លើង Sinabung មុន​ពេល​ផ្ទុះ​​ក្នុង​ឆ្នាំ​២០១០ បន្ទាប់​ពី​បាន​ស្ងប់ស្ងាត​អស់​រយៈ​ពេល​៤០០​ឆ្នាំ
ប្រែសម្រួល៖ Narin
ប្រភព និង​រូបភាព៖BBC